تغيرت بصراحه وطحت من عيني وبلاش عتاب
ولا ابي تسمع عتابي ولا انا اسمع عتابك


تنرفز طحت من عيني وبلا كثرة حكي واعصاب
لي اعصابن اذا ثارت تحطم تالي اعصابك


كثير القبلك وعافو من اجل تافه اعز احباب
وهذا انته مثلهم جيت تضحي باغلى احبابك


أنا متغيرت فجأه التغير صار له اسباب
لي اسبابي وانت تدري وجبتلي بالي اسبابك


اذا ترحل ابي تكفى تسكر بالطريق الباب
وإذا جيتك انا في يوم ابيك تسكرابوابك


انا ما فكرت في يوم توطيلي طرف وارقاب
لاني شامخ براسك وشموخي كان لارقابك


وعمري ما اختبرتك يوم وسمعت الذم فيك وعاب
وكلامك هذا فيني الحين ترى يازين من عابك


خبرتك بالمضى انك فلا يشغلك عني غياب
وكنت مثلك انا بالضبط فيك اموت واحيابك


وكنت متشوف غيري صح جميل وفاتن وجذاب
لكن للاسف لهناك رحلت وزال اعجابك


وقلبك كان في كلمه اذا يسمعها مني ذاب
وكنت تذوب اذا تسمع غزل من عندي بثيابك


ذكرتك يوم مغرم بي وكلك في غرامي شاب
ذكرتك حين عني رحت ونويت تطول غيابك


ولافكرت في جرحك وجرحي لو ذكرتك طاب
وكنت كلي فدا عيونك فدا رمشك فدا اهدابك


وكنت كل يوم اتعذب وألاقي صدك بترحاب
وكنت يازين ترحابي وكنت ياشين ترحابك


شسوي هذي الدنيا وطبعك يالهوا غلاب
ومنت راضي بحبي لك ومع ذلك ارضا بك


وتجيني بآخر اللحظات مكشر للغدر أنياب
يخي ارحل ترى موتي بسبب غرزات انيابك


اظنك حيل متمادي ولا حسبت لي حساب
ضميرك ارضى به عني يصفي تالي حسابك


تصاييبك عطيبه حيل واخرها يجيني صواب
ابد ما اقولها والله عسى ما صابني صابك


أقلك روح دام اخترت واتركني مع الأغراب
خليني مع اغرابي وانت مبروك اغرابك


انا مو طبعي الغيبه واعرفك زين من تغتاب
لساني اقطعه بيدي اذا ماراد يغتابك


انا ما اطيق انطقها السخافه وكلمة الكذاب
ولا ابي العب بساحه لطيفه وفيها العابك


اذا انت غبي صدّق انا ظني بذكائي خاب
وإذا انت ذكي مبروك عليك لمة اصحابك


انا منك جنيت الطيب وطيبك يا حسافه جاب
عسى الله لايرد طيبك وعسى الله عندي لاجابك


تغيرت بصراحه وطحت من عيني وبلاش عتاب
ولا ابي تسمع عتابي ولا انا اسمع عتابك








الكناري
يونس الجبوري
5/2/2010

تحياتي....